Повторно корпа од Европа! „Блудницата од Вавилон“, како што ја нарекуваат, ни удри елегантна корпа в лице! Ама ако, сами си ја баравме! А што си баравме, тоа и си добивме... Оваа дама не сака да ни даде ниту датум за датум за состанок, а не пак да сака да бидеме заедно. Ние сме отворени 24/7 за Европа и правиме сѐ за да ја задоволиме оваа дама, а таа толку грубо и дрско се однесува со нас! Срамота!
Ама имало и трета страна што се мешала во нашата врска! Некој сосед... Или, поточно речено неколку соседи биле во прашање? Излезе дека сите се против нашата врска?! Балкански сапуници! Тоа не ни пречи нам, или само ја јакни нашата желба за да бидеме заедно?!
Ако ние сакаме да воспоставиме врска со неа, тогаш зошто комшијата има привилегии во тој однос? Затоа што подобро се познаваат? Затоа што се во подобри односи? Па, чуму ни тогаш потреба за да воспоставиме врска? Или врската во овој случај е нужно зло?!
Ајде да не создаваме политика базирана на емоции! Ајде да видиме со отворени очи како стојат реално работите!
Нашите соседи креираат неофашистички партии кои функционираат на ултранационална фреквенција и кои генерираат лаги, манипулации и насилство врз својот народ! Нашите соседи шират верски и национални омрази! Ги уриваат принципите на добрососедство, на взаемна соработка и почитување! А што прави ЕУ? Ги финансира тие држави? Да! А за да биде парадоксот уште поголем таа Европска Унија се закити со Нобеловата награда за мир! Се прашувам каков е придонесот на златнозорскиот сосед за освојувањето на оваа (некогаш) престижна награда?!
Каде во оваа приказна е „неевропска“ Македонија? Таа е таму каде што се почитуваат различните националности, каде што се проповеда верска толеранција и меѓусебно почитување, таму каде што се нудат културните богатства, каде што луѓето од разни етноси, вери и култури со векови живеат заедно и си помагаат едни со други!
Јас сакам Македонија која нема да потклекнува и да подлегнува на секојдневните притисоци, уцени и ниски удари од нејзините соседи! Сакам Македонија која ќе продолжи со внатрешните реформи и која ќе изгради силна правна држава со доследно почитување на правото и правните прописи! Сакам Македонија со стабилна економија, со стапка на одржлив развој и перманентен раст на БДП.
Звучам песимистички? Зборувам во негативен контекст? Да, ама ајде да видеме за каква Европа сме! Ајде да видиме со кој сакаме да воспоставиме врска!
Јас сакам Европа во која вредностите, како што се рамноправност, недискриминација, различности и слични принципи, ќе бидат почитувани, а нема да стојат само како мртво слово на хартија. Сакам Европа во која ќе се чувствувам слободен. Сакам Европа каде што ќе бидам граѓанин од прв ред, а не Европа во која ќе бидам омаловажуван затоа што сум различен од нив. Точна е мислата што ја кажуваат постарите, дека во странство секогаш ќе бидеш странец.
Не сакам Европа во која ќе имам само должности, но не и права! Несакам Европа во која ќе ми наредуваат само што треба да правам, кој и што да почитувам!
Ајде да ја возобновиме идејата за Европа! Ајде да создадеме силен и сигурен заеднички дом, дом кој сите ќе го чувствуваме за свој! Обединети во различностите, беше мотото на ЕУ, нели? Ајде да го оставриме и во пракса!
Што има Европа да понуди, а го немаме ние?! Создаваме квалитетно образование, ајде да го направиме функционално! Донесуваме закони со европско знаменце, ајде да ги имплементираме и во пракса! Вршиме хармонизација на нашето законодавство, ајде и да го почитуваме! Пропишуваме европски вредности, а не умееме да ги цениме ниту своите!
Во Европа не се влегува, Европа и европските вредности треба да се прифатат, да се градат и да се гаат! Ајде да ја создадеме Европа во Македонија! А потоа, и Европа ќе нѐ сака како нејзин составен дел, бидејќи и ние сме дел од таа Европа, дел од тој дом!
Автор: Илија Јованов
Сите права се заштитени. Ниту еден дел од овој текст не смее да биде умножуван, препечатен во механичка, електронска или некоја друга форма, фотокопиран, снимен звучно или на некој друг начин, без претходно писмено одобрување од авторот.
(c) Copyright by Ilija Jovanov
All rights reserved