Генераторот на секојдневните инциденти кои се случуваат во Република Македонија е потхрануван од многубројни фактори. Овие фактори се од политичка, економска и пошироко општествена природа. Политиката која се води е причина за сè поголемата поделеност, како на партиска, така и на национална основа. Од секојдневните партиски говори, изјави и прес конференции, само се потпалува и поттикнува етничката и верската нетрпеливост и нетолерантност. Сиромаштијата, невработеноста и социјалната беда на граѓаните се само дел од причините кои ја сочинуваат економската природа на кризата. Мерењето на довербата на граѓаните во институциите на системот, само нѝ покажува дека истата е или минорна или не постои, што пак е индикатор за севкупната криза во социјабилитетот.
Случувањата кои (за жал) нѝ се секојдневие, нѝ покажуваат дека во самото општество имаме и тоа како сериозни работи на кои е потребно да работиме заедно! Одговорно тврдам дека е подобро тие да се спречат, отколку последиците од нив да се лекуваат. Самите ние, како индивудуи на ова наше општество, имаме одговорност и задача за случувањата во државата, како на општествено – политички, така и на меѓуетнички и меѓуверски план! Не треба да дозволиме да бидеме манипулирани од партиските центри на моќ и од нивните „прикриени“ послушници во медиумите. Партиите доаѓаат и си заминуваат од власт, исто и политичарите, но ние граѓаните ќе треба да останеме да живееме заедно едни со други. Нема иднина она општество во кое индивидуите или поедини групи живеаат во паралелни светови. Познато ни е дека паралелите не се допираат меѓусебно, но живеењето во паралелни светови е пресериозен индикатор кој ја генерира поделеноста и отуѓеноста меѓу луѓето.
Политичарите треба да се вратат на својата примарна улога и задача, која изгледа дека ја подзаборавиле, а таа е да се грижат за иднината на државата во целост, а не да се занимаваат со партиски препукувања за да соберат ситни политички поени. Кога е во прашање судбината на сите граѓани на една држава не смее да има несериозни испади на било кој од политичарите, кој ќе заборави на сè и на сите, заради остварување на лични или малубројни интереси и цели!
Да се вратиме на градењето на доверба помеѓу сите нас! Таа е највредната работа, бидејќи ако еднаш ја изгубиме, тешко дека ќе успееме да ја возобновиме повторно. Довербата е клучниот услов за постоење на соживот. Да научиме од минатото и историјата, да научиме од моментите кои заеднички ги поминавме овде, на овие простори! Премногу тага, солзи и крв стојат зад нас како споменик – незаборавник на нашата заедничка историја!
Доколку се продолжи со инциденти и тензии, предизвикани од било кој, ќе нѝ се случи ерупција на артикулираните незадоволства, кои ќе бидат само увертира во многу посериозни работи!
Затоа мојата порака е да живееме еден со друг, а не еден покрај друг! Во очите на луѓето да ја бараме човечноста, а не во нивниот надворешен изглед! Да се почитуваме меѓусебно!
Автор: Илија Јованов
Сите права се заштитени. Ниту еден дел од овој текст не смее да биде умножуван, препечатен во механичка, електронска или некоја друга форма, фотокопиран, снимен звучно или на некој друг начин, без претходно писмено одобрување од авторот.
(c) Copyright by Ilija Jovanov
All rights Reserved