Нека мирот преовладува на земјата и нека барем еден ден е исполнет со мир и ненасилство. Тоа би била универзалната порака за овој ден, денес прославуван во повеќе од 180 земји ширум светот. Еден ден во годината исполнет со мир е премалку, но и премногу во ситуација кога во светот, на повеќе меридијани, оружјето не мирува и кога крвави известувања стигнуваат од сите кризни жаришта.
Секоја година на 21 септември ширум светот се одбележува Меѓународниот ден на мирот, ден кој е посветен на јакнењето на идеалите за мир помеѓу сите нации и народи. Генералното собрание на ОН официјално го усвои овој датум како Ден на мирот во 2001 година, на тој начин изразувајќи ја својата посветеност на светскиот мир, како поддршка на сите луѓе што работат на постигнувањето на таа цел. Меѓународниот ден на мирот е востановен уште во 1981 година со резолуцијата 36/67, на Генералното собрание на ОН, а првиот Ден на мирот бил обележан во септември 1982 година. Во 2001 година, Генералното собрание на ОН едногласно ја усвои резолуција 55/282, со која 21 септември се востановува како годишен ден на ненасилство и прекин на огнот.
За време на дебатата за резолуцијата на ОН што и официјално го прогласи Меѓународниот ден на мирот, беше речено: „Овој ден ќе служи како потсетник за сите луѓе дека нашата организација, со сите свои ограничувања, е жив инструмент во служба на мирот и треба да ни служи на сите нас во организацијата како ѕвоно кое постојано не потсетува дека ние сме постојано посветени на мирот, над сите интереси и сите можни разлики“. ОН ги повикува сите нации и народи ширум светот да го почитуваат прекинот на непријателствата во текот на овој ден, и воедно да организираат најразлични настани со кои ќе го одбележат Денот на мирот, пред сé, преку едукација и подигање на јавната свест за прашањата поврзани со мирот.
„Меѓународниот ден на мирот е ден за глобално прекинување на огнот и за ненасилство, покана до сите нации и луѓе на тој денот да ги прекинат сите непријателства.“ – се вели во дел од Резолуцијата на Обединетите Нации. На овој ден насекаде во светот треба да има прекин на огнот и воздржување од насилство, а луѓето се повикуваат да чинат само добри дела. Во пораката на ОН денеска на сите луѓе во светот им се советува да „пропагираат мир на лично ниво“, односно да поминат еден обичен и мирен ден.
Оваа година, ОН го одбележуваат Меѓународниот ден на мирот под мотото „Образование за мир“. Оттука, уште поголема е потребата, но и желбата и ние како млади луѓе да се вклучиме во одбележувањето на денешниот ден.
По повод денешниот ден на мирот потребно е да се организираат трибини и манифестации на кои активно учество би зеле младите луѓе, пред сѐ, средношколците и студентите.
Сите права се заштитени. Ниту еден дел од овој текст не смее да биде умножуван, препечатен во механичка, електронска или некоја друга форма, фотокопиран, снимен звучно или на некој друг начин, без претходно писмено одобрување од авторот.
(c) Copyright by Ilija Jovanov
All rights reserved
