Форсирањето за запишување на студенти на техничките факултети, во однос на факултетите за општествени науки, не смее да се сведе само на кампања. Но, и ние кои студираме на факултетите од областа на општествените науки не смееме да бидеме потценети и маргинализирани од страна на државата и нејзините институции!
Правејќи осврт врз трендовите кои постојат последниве неколку години во високото образование во Република Македонија, евидентно е дека младите луѓе се запишуваат на факултет заради следниве причини:
- надеж дека со диплома за завршено високо образование полесно ќе се најде работа;
- можноста во текот на студиите да се аплицира за заминување во странство и
- одложување на процесот за вработување.
Во минатото на младите луѓе им ја всадувале во глава максимата „учи за да не работиш“. Денес, за жал, оваа максима буквално си го пронашла своето место во општественото живеење. Сведоци сме за илјадници дипломирани млади луѓе кои си го бараат своето место во општеството по напуштањето на универзитетските клупи и амфитеатри. Но, состојбата не е воопшто розова. Чекајќи вработување согласно факултетската диплома тие се принудени да работат буквално било што за да егзистираат. Голем дел од нив никогаш нема да се вработат согласно своето образование и потенцијали. Во 2012 имало за 6 проценти повеќе дипломци за разлика од 2011 година. Секојдневно се среќаваме со луѓе кои ја делат оваа судбина и тоа е голем удар, барем за нас студентите. Тогаш започнуваме самите да си поставуваме илјадници прашања на кои не успеваме секогаш да пронајдеме одговор, но на крај ќе си речеме самите на себе „ајде ќе биде подобро“. И мораме да веруваме во тоа, но и да работиме напорно за да се оствари! Не смееме да се предадеме! Стапката на невработеност во Македонија во првото тримесечје од годинава се намалила и изнесува 29,9 проценти, во споредба со првиот кваратал од минатата година кога изнесувала 30,6 проценти. Светската банка во својот последен извештај наведува дека 53,5 проценти од младите на возраст од 15 до 24 години во Македонија се невработени. Тоа се околу 300.000 млади луѓе!
Сепак, горенаведените податоци можеби и не се во целост вистинити со оглед на тоа што не е за потценување и бројот на студенти кои во текот на летниот период заминуваат на привремена работа во странство. Дел од студентите низ смеа ќе Ви кажат дека денес матурантите се запишуваат на факултет токму поради оваа можност – да се отпатува во странство. Доколку во странство успеат да пронајдат две работи, ќе можат и нешто да заработат. Во спротивно може само да се заработат пари во ист износ како оној што пред да заминат го плаќаат. Но, ќе Ви речат најважно е искуството што ќе го стекнете и можноста да прошетате.
Не е толку тежок и мачен периодот за време на студирањето, колку што знае да биде процесот на вработување. И на државата ѝ е јасно дека доколку најголем дел од младите се запишуваат на факултет и студираат, на краток (неколкугодишен) период се одложува проблемот со невработеноста. Но, потоа проблемот излегува на виделина. Во нашата земја поразителен е податокот за невработеноста кај младите луѓе. Оваа стапка на невработеност мора да се намали, затоа што младите луѓе се движечката сила на секое општество!
Форсирањето за запишување на студенти на техничките факултети, во однос на факултетите за општествени науки, не смее да се сведе само на кампања. Во голем дел, во време на криза, државата треба да ја има одговорната улога да им помогне на младите луѓе кои дипломирале на факултетите од областа на техничките науки со тоа што ќе го поттикне и подржи отворањето на фирми каде овие млади луѓе би се вработиле. Но, и ние кои студираме на факултетите од областа на општествените науки не смееме да бидеме потценети и маргинализирани од страна на државата и нејзините институции!
Автор: Илија Јованов
Сите права се заштитени. Ниту еден дел од овој текст не смее да биде умножуван, препечатен во механичка, електронска или некоја друга форма, фотокопиран, снимен звучно или на некој друг начин, без претходно писмено одобрување од авторот.
(c) Copyright by Ilija Jovanov
All rights reserved